قصيدة : ما كنت ادري شكثر بفقدك

و أنا ما كنت أدري وش كثر بفقدك

إلا يوم خذاك التراب و دثرك

أصعب كلام ينقال اشتقت لك

ليت تنفع اذا انقالت لميّتك 

ما ادري تسمعني في أحد خبّرك

صوتك وحشني .. وحشتني ضحكتك

عساك متهنّي في مرقدك

كل دعاوي قلبي تحضنك

حبيب عيني و غلاك و معزّتك

ما تطلع من بالي صورتك

ما أصعب كلمة الله يرحمك

دفن أبوك هو اللي يقبرك

ما أتمنى غير الله يسعدك

و يارب ، بالفردوس الأعلى يبشرك

سحر صوان

6/2/2015

قصيدة : تعلمت من الحيآة

تعلَّـمت مـن الحـيـآة أشـيـاء كثيـر .. و أولـهــا ان الـنَّــاس مـا تـنـفـعـك

لو غـلـطت معـهم غـلــط صغـيـر .. حـتى اقـرب البـشـر لك تـهـجـرك

عـزهم بس لا تحبهـم حـب كـبـير .. خـلِّـي الـحـب لأمـك و أبـو يحـبـك

و ارفـع راسهـم و احـسن التفكـير .. و لا تـخـلِّي مـظاهـر الدنـيا تغـرك

و اصنع نفسك و كوِّن لها اساطير .. و خـلِّي طـموحـك عـالـيـه ترفعـك

و لا تخـلِّي للفـشَـلة علـيـك تـأثـيـر .. ترى اللـي ما يعـرفـك زين يجهلك

ان فـشلـت مره طلـع للفشل تفسير .. صلحه , و لا تسـتحي مـن غلـطـك

العـظماء ما هـم عـن البشـر غيـر .. و ما صاروا عظماء إلا بمثل فشلك

و ردد اسـم الله عـلى لسـانك كثير .. اذا نجحت و لا تخلِّي هالدنيا تاخذك

انجـح لكـن مـعـه احـسـن التـدبيـر .. و خـلِّـي آيـات القـرآن هـي تلهـمـك

لان عـمـرنـا في هذه الدنيا قصير .. و انت ما تضـمن الكره دايم بملعبك

و لان مردنا كلنا بالاول والأخـير .. لله , سـوِّي شـي بعـد موتـك ينـفـعك

قلم / سحر صوان

قصيدة : الغريب

لين متى بتحمل هذا الغريب .. 
لين متى بتحمل ياخذ مكانك ! لين متى و عن عيني ما يغيب .. 
لين متى يحاول يعوِّض حنانك ! ما درى .. 
ما ابي غيرك حبيب ..
و زمانه ولا شي عند زمانك !
خلني حَي و ارجع لي قريب .. قلبي ما يصونه كثر ما صانك
مُريب الاحساس لا شفته مُريب .. 
كأن قلبي يدق و يقول : خانك ,
ما غيرك انت تاخذ بي و تجيب .. و ما غير يا بختهم والديك و اخوانك
خلِّي الوصل لغيرنا فينا يطيب 
خلِّي اللقى دايم مرَد للسانك ..
تعال , قلبي على شوفك لهيب .. كأن كثَر شوقي و قمت أميِّز بنانك !
كل ما قلت الليله ظني بيصيب 
و بنساك و الله يعين مثل ما عانك .. 
كأن الليله ترد و تقول ظنك يخيب 
انت ما تقدر تنسى اللي قدر نسيانك 
ليه غبت ! مو عيب انك تغيب ؟ .. عيب ذاك الغريب ياخذ مكانك .. 
ليه غبت ّ و بغيابك خلِّيت الغريب ..
يآخذ شي بالأساس على شانك !
بلغه اللي سمَّاني حبيب .. القلب مو صاينه كثر ما صانك ., 


قلم / سحر صوان 

قصيدة : ما اشتقت لك

طال فراقنا و ما اشتقت لك
ما اشتقت لشوفة عينيك .. ما اشتقت أجلس و اتأملك
ما اشتقت للمسة ايديك
ولا جا على بالي اسألك .. ليه غبت و الشوق بعينيك
ليه غبت و حبك يقتلك ..
و أنا بعدك أموت فيك
أبد .. لا ولا حنِّيت لك 
و لا جابني شوقي أبيك 
بس يكفي للحين أتخيَّلك .. و للحين بقلبي أحتويك ..
و شاب الهدَب يوصلك ..
و كل ليله أبكي عليك 
و شاخ القلب يتحمَّلك
حتى مل قلبي يحتريك 
قلت لك ما اشتقت لك .. أكابر .. 
يمكن الشُّوق يجيك .. و تجيني و البشر تعذلك 
و ما يعود لي دمع يبكيك ,
إلا نسيت .. و ما قلت لك :
اشتقت لك ..
و انت الله يهديك "(

قلم : سحر صوان 

قصيدة : قال راجع لك بكره

غاب و قال راجع لك بكره 

و ليته قال بكره من اي عام

كأنه راح و شب خافقي جمره 

سنه و سنتين و عليها ايام 

و انا ليتني ألقى للوصل فكره

ولّا اقلها اقول عند بابه سلام

هو الحب ممكن يجي من نظره  

و لّا اللي خذاني غير حب و هيام

و انت طعم فراقك قهوه مُرَّه 

لا استصيغها و لا تعدل لي النظام

و هالليل اذا خذا العاشق بسرَّه 

تحسبه راحه و هو عذاب و احلام

كل ما اقول أمنت الليله من شرَّه 

اغمض عيوني و أشوفك بأول منام

ودي تجي تسال ولو بس مرَّه

تسأل عن احوالي او تبدي اهتمام

يا غايب سنين لك لهفه و حرَّه

ودي بصوتك او شوية كلام

لك من تحت وجنتينك حفره

لا بانت علَت احوالي تمام 

يا مبهر فيني كل خليَّه و فقره

الله على حسنك يا رفيع المقام 

يشبه لك الليل لا اقفى على قبره

و تشبه لك الشمس لا شرقت بالاحلام 

و تشبه لك كل وجيه العَبَره

و تحلا لي صورتك بين الزحام

ماخذت من فراقك اكثر من العِبره

و الصد عن غيرك و هجر الغرام

قلم : سحر صوان 

قصيدة : الشتا

ما قلت لك و الدّنيا شتآ .. و الجَو غيم و به مطر
اشتقت لك و أتعبني الظما .. و المطر يروي هالشّجر
و ما قلت لك في هالمسا .. غيابك موّتني قهر ! '(
و ما قلت لك كبر السّمآ
ان حبك بقلبي كبر ..
و مرّت سنه من هالعنا و ذكراك مثل موج البحر
لا هبّت نسايم هوآ .. 
ذكرت حبك و السّهر
و أحلا سنين و احنا سوا 
كنت أنا أسعد بشر 
أبشّرك يا العاذل ترآ .. ما عدت أعرف عنّه خبر
شكيت للّيل راح و سرى .. و النّهار كأن قلبه حجر 
ذاك الشتآ بعام(ن) مضى .. 
كنّا سوا و الحب حضر
اشتقت لصُوتك و الدّفا 
اللّقى على ظروف الدَّهر 
و اشتقت ؟ ولّا بس أنا ؟ 
و لّا الشّوق منك ما بَدَر ؟   
و ما قلت لك انتَ الهنا .. بغيبتبك قلبي انفطر ! 
من فراقنا و قلبي نوى .. ينساك و مسخره القدر
و أدمنت حبك بالعمى .. و بحسنك القلب انبهر 
و ما قلت لك في هالشتآ  
تمنّيتنا .. تحت المطر .. '(


قلم / سحر صوان 

قصيدة : ديسمبر

يقولون بديسمبر تنتهي كل الأحلام 

و أنا لقيتك بديسمبر و ابتدت أحلامي 

من شفت زولك قال القلب قدّام 

كأن بعيونك سِحِر و تصيب يا رامي

ببساطة خذت قلبي و قلت السّلام

ما قمت أشوفك إلا بخيالي و منامي

كل غلا النّاس بعدك على حد الإعدام  

يا مَلَك هُم بشر ولكلّ ذي مقام مقامي

أنا من شفتك أدمنتك فكر و اهتمام 

و يآ كثر اللّي يحبوني ولا طالوا اهتمامي 

لا جيتني تلخبط كياني و يضيع الكلام

و كأن الكلام اللّي بالقصيد ماهو كلامي 

الحواس بقبالك هي من جمع الأصنام 

عيونك سد و الضحكة صوتها غرامي

إشتقت لك .. مثل المفارق من أعوام

يا بري حالي على شوفتك والشوق دامي 

اشتقت لك و يا مطوَل بُعدك و الأيام

ليتك ترجع على غفلة و تلخبط نظامي 

كنت أحبك و صرت اعشقك كثر الآلام

المعذِرة يا حُب .. انت يسمُّونك هيامي

كامل و الكمال لله .. و أنا وضعي غرآم

ان كان حبّك عذاب .. هو فرح قدّامي 

عشقت ديسمبر ، لانه بدآ قصه هيآم 

و شق طريق السعاده لباقي أيامي

21/12/2012

قلم : سحر صوان

قصيدة : شوقي و غيابك

شوقي و غيابك قصة عذاب 

يوم قلت نسيتك لساني كذَب

طوَّلت بُعدك و طوَّلت الغياب

هجرنا بعضنا من أتفه سبَب

أثر الدمع بعدك على الخد غلَّاب

جمر(ن) كأنه .. و نار و لَهَب

ما حلالي غيرك انسان ولا طاب

لو جماله أخذ العقُول و سَلَب 

باقي على عهدك بغرام أحباب 

الوفا من شِيَم و أطباع العَرَب

أقُول الحلا فيك هو كل العِجاب

و ضحكتك صوتها حيآة و طَرَب

وين ما مشيت تستثير الإعجاب 

طبع البشر يحبُّون الماسُ و ذَهَب

ما تشُوفك بالمرايا حلُو و جذَّاب 

ولَّا خلني مرايتك و تشُوفِك عَجَب

هو حلا هو غلا ولَّا سِحر الاهداب

تَلَّت بها قلٌوب و تمنُّوا هالهَدَب

تزُورني بحلمي و بالواقع سراب

كأني بحلمي طالبك اسم و طَلَب

أنشدك عن وصل ولو كان لعتاب

أثر العَتَب هو حيلة اللِّي ما غَلَب

قلت نسيتك و كان التَّفكير للذياب

والأساس هي طلعت بلحظة غَضَب

قلم / سحر صوان 

قصيدة : أنشد اللقى

صرت هادي و رومانسي و يروقني عبدالحليم

الصبح فنجـال قهوة و أستحـلي معه مُر الحنـين

و الـفـراق اللِّـي خـذانـا من ذاك العـام " ضيـم "

صار الدمـع كـل ليـله .. بعد ذيـك الليـله روتيـن 

ضامـي بغيابـك و انت بغيبتـك و هجرك كريم

لو اللِّيـل يتشمَّت .. تشمَّت على هالقلب الحـزين 

علـى كثـر مـا شهـد لي دمـع بيـن أهـدابي مُقيـم 

بسيـطة لو تشمَّـت وش كثـر قالـوا لي مـسكـين 

النَّـاس تدعـي لها بالهدايـة و الطريـق المستقـيم 

و أنا ما غيـر أدعـي يا رب يصير اللقـى الحين 

والله أبـي شـوفـك كثـر مـا تبـي المولـود العقيـم 

و والله لا افـرح بـك .. فرحـة هـاذيـن الوالـدين 

شُـوف غـلاك بقلبـي و قُـول : سبحـان العـظـيم 

مـن خــلَّا لك غــلا أوَّل مـا شفـتـك بدقيقـتـيتـن 

كـأن الـجـمـال فيـك مـن جـمـال جنَّـات النَّـعـيـم 

هو جمالك خُرافـي ! ولَّا كذا وصـف العاشقين 

أشُـوف اللِّيـل بعيُـونـك و أشـوفـك كـلك وسـيم 

و أشُـوف الحـلا بقبالك .. كأنه عجـوز سبعين

كيف يقولـون أحب غيـرك و انت الحب القديـم 

باقـي علـى حبـك .. كـأنـي احـبـك قبـل يومـين 

أشـوف النَّـاس تدعي برضى الرحمـن الرحـيم 

و أنــا أنـشـد ربّـي للـقـى كـل ســاعـه و حـيـن 

قلم / سحر صوان

قصيدة : حال العرب

يالمصطفى ليتك تشوف الأمه و الحضاره

ليتك ترجع تعلّم الناس كيف ممكن تعيش 

صارت الناس تمشي بالشوارع سكاره

يسرقون و يزنون ثم يقولون وقت طيش 

البنت عادي .. تحب و تعشق ولد الجاره 

و الولد يمسك يدها و يمشون بالكورنيش

و إذا ارتفعـت حرارتـها درجة حـراره 

يجي يبوسها و يقول أنا أحبها معليش !

راحت القيَم و الحرمآت للي بجنب داره

و لو الذنـوب تتكـلم كـان تقـول بشويش

نـاس تعيش بأماكـن الفسـق و الدعـاره

و ناس كل همّها ( مخدّرات و حشيش ) 

ما بقى من الطيب إلا البقايـا من آثـاره 

و لا نص البشـر .. يبخلون بكيس خيش

صرنآ بعاد عن الله و الطاعات و أذكاره

و المعاصي من كل صوب جيـش جيـش 

هجرنا الفرض و القرآن و صلاة الاستخاره

و لا صابتنـا الهموم قمنا نصيح ليش !!

كنّا نعطـي الفقيـر اللّي ينظف العمآره 

آخر الشهـر زياده على راتبه بقشيـش 

صرنآ نستكثر و نقول ليه الخسـاره 

نروح نستفيد و نشتري صحن عيش

كنّا نسلّـم على اللـي يغسِّـل السيّـاره 

و صرنا نحتقر كأن على راسنا ريش

تركنا سيرة الرسول و سيرة الأماره

و إذا اسألونا عن ديننا قلنا .. ايش ؟ 

صار الايمآن بقلوبنا .. مثل السيجاره

يتفكك وحده وحده بشويش بشويش
لأننا نعيش بالنعمة و نسفه بهالفقاره
و غيرنا يموت و هو مو قادر يعيش

قلم / سحر صوان

قصيدة : الشعر

خيآلي واسع أعشق الأدب و الشعر 

لأنهم يوصفون المشاعر بأشكال فريده

بوح من خاطر .. ممكن قصيد أو نثر 

أفكار ، ترابط ، تراكيب ، صور جديده

أشكي له همي كأنه من خلق البشر 

لا .. البشر خوّان أما القصيده قصيده

و الصراحه و الأساس من بداية الأمر 

أقدر أوصف و اشتكي للي ما حاجه بايده

و لو على السوالف ماتخلص طول العمر 

لكن أخاف أتكلم و ألاقي القلوب وقيده

مثلا بمدح الحب و أقول أحبه وش كثر

يجتاحني هدوء و أتناسى الجمل المفيده 

و الله أغار أحد يسمعني أمدحه ' أنقهر ' 

لأني لا مدحته رفعته فوق السحب البعيده

أنا نفسي لا تخيلت كيف بمدحه أبتكر

و أملّي الدواوين بأبيات جديده وليده

فتّان .. بالذات لا ابتسم بذاك الثغر 

بسمة تَرف بسمة شغف بسمه رغيده 

له من السود الناعسات الّلي تثير السهر

تلغي كل جمآل الزرق و الخضر و تبيده 

و أهدابه قصه عشق ما يحكيها بشر لبشر 

تصد عيني عن غيره و امشي معه سيده

صوته طرب .. اسمه شرف .. قربه عمر 

أسلوبه راقي .. ذوقه رفيع .. أفكاره عنيده

مخلوق من الجنه ورى الحيآة و ورى القبر  

ذاك اللي تركنا أنا و قلبي على الحديده

عد حبات الترآب من أمريكآ لجنوب قطر

قدهم احبه بالثانية .. دبله كل شوي و زيده

قلم/ سحر صوان

قصيدة : كنت أظن

كنت أظن بعده ما يدوم غير يومين  

و مرّت سنين و ماله على الوصل نيَّه   

كل يوم أقول بكرا نتلاقنا حنا الاثنين

يجي بكرا ويحطم أحلام بالأمس مبنيَّه 

و أرجع أحلم و أقول بكرا يمكن تزين

و يمر بكرا و بعده .. و ما تجمعنا سويَّه

و ألعن الحب و ألعن سنين العاشقين

و ألعن رياح الشوق و هبوبها العتيَّه

ثم ياخذني الموج بالذكريات و الحنين

بين عيونه و ضحكته و أسلوب العفويَّه 

و أنا لا ذكرته أبتدي القصه بدمعتين

و ما أنهيها إلا و دموعي سرِية سرِيَّه

ثم تجي أمي تسالني علامك حزين

و قلبها متشفق و صوتها كله حنيَّه 

تشوفني أذبل كأني من جيل خمسين 

و أنا توني باقي على باب الثانويَّه 

بالله يا عرب .. وش أقول لها الحين ! 

أقولها البعد كأنه سكاكين مخفيَّه !

و لا أقولها ''دخيلك لله يا محسنين'' 

أنا بس أبي شوفته و الكرامه منتهيَّه ! 

و أنا أدري الحلم بشوفته  ( فلّين )

و يا كثر أحلامنا وهي بالواقع خياليَّة

يا مصعب الفرقا و موادع المحبين

يا هي على قلب العاشق والله قويَّه 

الله لا يجيب مفارق حبايب و غالين 

و جعل عيون الحسود لشر البليَّه 

تكفين يمه .. لا تسألي علامي حزين 

قلبك ما يتحمل من اللي بقلبي شويَّه

قلم / سحر صوان

قصيدة : العيد

مـر وقـت .. و راح عـيد و جـا عـيد 
و أنـا عجـزت أنتـظر للقـى ميـعـاد 
لا حنّـا التقيـنـا صـدفـة مـن جـديـد 
و لا بالعـيد تهنّيـت مع باقـي العبـاد 
و كيـف العـيد يصـير بدونـك سعـيد
و أنت أرضـك بـلاد و أنا أرضي بلاد 
لا توصلنـي طيـارة ولا سـكّة حديد 
مسـافات الجـفى ما يجبرها جمـاد
عيـدي : عـيد بارد بـاحـسـاس بلـيد 
و المـشـاعر مـن بعـدك كلهـا رمـاد
أدوّر من يشبهك و انت وحدك فريد
كـل البـشـر بـعـدك بعيـُونـي سـواد
يـهـيـج لك حنين كـل لحـظـة ولـيـد 
بين ذكـرى وتمنّي ولا جاب الحصاد
وش الشّعِـر بعدك و أبيـات القصيد
ولا حب بنات هالوقت و حب الأولاد 
أحبـك و أعـشقـك و أنتَ لي الوريد 
لـعـب و كـذب .. و لآخــر الـتـعــداد 
وأنت من هو بجمالك ولا عليك يزيد 
انت جمالك خُرافة وأساطير الأجداد 
وش الملاك بقبالك ولا القمر البعيد
انـت بحسـنك سوّيـت عليـهم عمـاد
تـل قلبي معـك مثـل ذوبـان الجـليد 
لا مثـلك يتـكـرر ولا جـمـالك يـنـعـاد
ثامن ال7 العجاب شاب بقلبي وقيد
من عرفتك وأنا أحبك كل يوم بازدياد
مـا أقـول إلا : يا عسى عيدك سعيد
أثـرني ذكرتك و نسيت سالفة الأعياد

قلم / سحر صوان

قصيدة : دنيا عجيبه

يا قصـور وقت اللّقى و يا طول الـوقت بالغيبه

و يا قصور زماننا الماضي و يا طول إلي بقى 

الحاضر نصه نعيشه بالمـاضي و تذكـر حبيبه 

و نصه الثاني اللي يشغلنا حنا و قلوبنا بالهوى

لا حبينا نفارق و لا كرهنا بقينا و الدنيا عجيبه 

و الله يحفـظ مفـارق خـذا قلبي و روحـي سـوا

لا مـن طـرا لـي تالـي الّليـل أدعـي اللـه يجـيـبه

لــو بحـلــم(ن) يصبـّر قلـبي علـى بـعـاد الّلـقـى 

كـل مـا تذكـرت صـوته و ضحكتـه و أساليـبه

قلت الله لا يهدينـي عن حبه ولا يجعـل لي دوا 

الدمــع إللـي ملـى محجـري بغيـابه و أهلّـي بـه 

كانـه عن شـوف غيـره يبـي يصيبنـي بالعـمى

و اللـه ان حالـتــي بعـد غـيـبـتـك كلـهـا غريـبه

أتـخــيّـلك بـقــبـالـي و انـت مـخـاوي الـجـفــى

أرسـمـك مسـتـقبـل و أحـسـك لقـلبـي نصـيبـه 

و ابني بك طمُـوحـي و انـت مفارق هالحـشى

اشـتـقـت لشـوفـتـك يــا دوا القـلـب و طـبـيـبـه

ليـتـك تـشـبـع غـيـاب و تعـطش لشـويـة وفى

يــا مــلك الـحـسـن مـخـلُـوق لـك ألـف هـيـبـه 

كـلـهـــا نـظــره .. و تـتـل الـقـلــب بـالـهـــوى 

لـيـه أهــاب غـيـرك و انـت قـلـبــي تـصـيـبـه 

و لـيـه اشـره عـلـى غـالـي و أنـت كـل الـغـلآ

يــا زيـن تـرى درُوب الـهـوى كـلهـا صعيـبه

و أنـت لا عتقتني ولا ذوقتنـي كاسـات الهـنى

هـــواك يـا هــوا .. الّـلــه وكـيـلـه و حـسـيـبـه

ليـت صبـري علـى بعـدك كفـارة اللّي مـضى

يـا عـســى ســاعـة الّلـقـى مـيـعـادهــا قـريـبـه 

يـا جـمـال الـعـرب و سكـرهم و أطيبـهم حـلا

ولــو ان الـحـيــاة تـعـلـمـنــا الـدنـيــا عـجـيـبـه 

حـتــى ظلّــك بـاللّـيــل يـفـــارقـك و مــا بـقــى

قلم / سحر صوان

قصيده : التقينا صدفه

الله يسعده بصباح العشق إللّي حضر

قرّت عيوني بشُـوفة الّلـي صحى بدري

شفته صدفه و الصدفـه تسـوى العمر 

يا ليت اللقى دايم مكتوب في قدري  

الحـلاوة بالمستحيـل لمَّا تشُـوفه قـدر

و احلامي لقـاه و طـال معـه صبري

اليُـوم أثره قبـالـي و قَلَـب قلبي حـدر 

لاجبت خبـر البشر ولا جبت من خبري

محـلا طلّتـه و الغمازتيـن بخدينه تحَفِر

جبَّـار الجمال اللّي بعرُوق دمه يسـري  

أقبل على قلبي يشعل بي فتيل الجمر

عديل الرُّوح بين الحنايا مكـانه بصدري 

كأن اللِّيل بعيُونـه يجي مع لُون البحـر

و طلّته مثل المغيب أوزن بهـا شِعـري 

تجمَّل به الصبح وبقطراته ندى الشجر 

تولَّع به خفُوقـي على غفله وأنا مـدري 

واحد(ن) و كل البشر حُـوله '' صفـر ''

شكت رُوحي رُوح سكنتـها من صغـري 

لا من تثنَّـى على عرشـي غيـر القمـر  

و لا رضِيت حُب من يقوى على هجري

ياللّـي بحكيـه كـأنـه علـى قلبـي يـأَمـر  

ترانيم صوته كِـل الوقـت علـي تطـري

كأنها تغاريـد العصافيـر من بعد الفـجر  

تقفـي على ليـل(ن) يشب في جمـري

وصلنا اليوم ساعـه تسـوى كـل الدهـر

يا واحـد(ن) بأساليب العشـق ما تزري  

أبشر دامنـي أحبـك بالقصايـد والشّـعر 

ونهج القصيد أحبك ثم أحبك لتراب قبري 

قلم / سحر صوان 

قصيده : اللقى مستحيل

حنين و شُوق و ضجَّة قلب و انزعاج 

و الذكرى و راها ذكرى و سرى اللِّيل 

ضيق صدر و خلق ضيق و تعكر مزاج 

حب معـااه عشق و اللِّقـى مستحيـل 

سنه من مفارقك و ما للقلب اعوجاج 

سنه .. و صُورتك عن بالي ما تميل 

كأنك لي مرايتي و باقي البشر زجاج 

بغيبتـك أضمى .. و لقانـاا سلسبيـل  

سنه و القصاايد تحضر لك بامتزاج

و إذا اكتملت قصيده ما تشفي الغليل

كل يوم نتلااقا .. و أثر اللقى ميراج

كأن الفراق على طيفك يحملني جميل

من عام(ن) و مالي مع النَّاس اندماج  

كتُوم و وحدااني و شي من هالقبيل 

كأني سجينك و انتظر حكم الافرااج 

و كأنك الهوا الي يحط بالصدر و يشيل 

شلت قدرك فوق بأعلى الرَّاس تااج 

و صارت القصاايد تحيي الِّليل المليل  

كل مااقول بنساك اردد لو طار الدجاج 

انا ما احبك يوم و انسى مثل هالجيل 

و ان جينا للجمال.. فيك افوااج افوااج
انت كل ما فيك يا بعد عُمري جميل

قلم / سحر صوان

قصيده : يا قوى قلبك على النسيان و الغياب

يا قُوى قلبِك علَى النِّسيان و الغيَاب
                              و يا ضِعف قلبِي علَى نسيَاك و الهَجر
كِل ما شَـد الحَبل قِلت فـرَاق أحبَاب
                              و كِل مَا رخى يجيبنِي شُوقِي و اعتذِر
دَام كلِّـنا مِن تـرَاب و مردِّنا للترَاب

                              و المصِـير اللِّـي ينتظرنَا ظِلمـة القبِـر
يالغـلَا خَـاف الله و اكسَب لِك ثوَاب

                              حبِّنِـي .. و انَـا بدعِي لِك طُـولَ العُـمر
البشَر كثَار .. لكِن وِش جَاب لجَاب
                              ترَى النَّجِـم مَا يسَـاوِي الثِّريَـا و القمَر
و الشُّـوق اللِّـي يحِط بالقَلب غـلَّاب
                              و الذِّكـرى تجِـي علَـى غفلَه و تسـتِقر
و يَـا قَلـب العَـاشِـق تحمَّـل العـذَاب
                              بتـخِـط القصَـايِـد و يخَـاوِيـك السَّـهـر
دامِك انت والعِشق صِرتُوا أصحَاب
                              أبـشِـر بعـذَاب(ن) علَى طُـول الدَّهـر 

قلم / سحر صوان

قصيده : البارحه

البارحـه الذِّكـرى تحـط بالقلب و تشـيـل

و يشهـد الله صـورتك ما فارقتنـي ثواني

طَـرَت لـي ضحكـتك يالصُّـوت الجمـيـل 

ضحـكة(ن) ليا ضحكت .. تطرب أذاني

البارحـه تمـنِّيـت لك من خـلـق الله بديـل 

لكـن يـا بـري قلب(ن) غيـرك مـا يداني 

مـا أقـوى مـن فـراق الخـليـل إلا الخليـل 

راحـت أيـام(ن) كـانت تشُـوفـك أعيـاني 

بخـاطـري ضيقه .. و دمعتي عيَّت تسيل

الشَّـكوى لله .. حـتى الكـلام ذاب بلسـاني 

يالغـالي قُـولـي مـن بعـدك يشـفـي الغليـل 

مـن هـو بنظـرته أنسـى النَّاس و أنساني

و عيُونـه سُود(ن) أسوَد من سـواد اللِّـيل

بديع خلـق الله ينزح القمر و يقول مكاني

اشتـقـت لك والله .. و شُـوقـي مسـتـحـيل

ما غير أطوي شوقي بقصيدي والأغاني

المشكـله بالوَصـل .. دامـه بايـد البخـيـل 

يطـول الغيـاب .. و أنـا البـعـد أشـقـااني 

و أنــا والله للشـقــى مـا بـقـى لـي حـيـل 

بس انت حبيتـك ولا أبي واحد(ن) ثاني

كـل مـا أذكـر غـرام(ن) خـلَّانــي قـتيـل

احـن لك و أنـا أدري مـا جـاك ما جاني

قلم / سحر صوان 

قصيده : صباحي صباحك

صباحي عيونك يا موسع(ن) صدري
و يا محلا صباحي و صباحي صباحك

ليت كل الأيام إلي تمر في عمري
صباحي صباحك .. و رباحي رباحك

يا ابو هالعيون اللي صحت بدري
عساك بصباح(ن) يزيد بأفراحك

ادعي لك .. و ليت جبت من خبري
يا زين عسى دعائي يقويك بفلاحك

يا طول بالي عليك و يا كثر صبري
و يا كثر حبي لك و يا حبي لرماحك

لو ماجبرتني بغلا .. جراحك هي جبري
ولو ما تصبحتك الاقي سعادتي جراحك

لا تسالني عشقتك كيف ! والله ما أدري
عشق غريب لغريب عساه يهز برياحك

لو شخص غيرك بأسلوبك شبره بشبري
ما صار و تركتني تحت رحمة جناحك

أعرف! لو يحبك الكل ما يحبونك بكثري
و لو أحد يجرب ! يموت و أصير سفاحك

ولو تحبه أكثر و تحط و تشيل في بقبري
 حسبي الله .. بجي و أعلن سماحك 

فيسعد لي صباحك يا موسع(ن) صدري
مدري الوسيعه من صباحك ولا جراحك

قلم / سحر صوان

قصيده : سرى الليل

سرى اللِّيل و طلع الفجر و العين ما غفت

شمس(ن) نوَّرت الدنيا لكن القلب مظَلوم

كانه المشتاق ولَّا اللِّي همُومه استفحلت

البشر تنام و هو اللِّي من النُّوم محروم

روح(ن) ما غير بعذب القصايد استنجدت

كل يوم بقصه و ما بين بوح(ن) و الكتُوم

ليتها بفايده .. كتبناها و مع الذكرى تعلَّقت

لا وصلت للي نبي .. و لا قراها للعلُوم

القصيده من الشُّوق اللِّي سيُوفه قتلت

ولا راحم(ن) للشُّوق و الله فوقه رحُوم

هو بشر ! لكن ملك ! و يا عقُول فهمت

يخطي دايم .. لكن الخطا عنه معصُوم !

يعني خطا لكن بالغلا .. كفِّته رجحت

يعني بالطِّيب او بالخطا حبه بيدُوم

و الحب كلَّه مذلَّه و الأحوال تبهذلت

لا الحياة الهنيَّة .. ولا تعيش محشُوم

قلم : سحر صوان

قصيده : على دروب الغزل

دام الحكي ما عاد ينفعك و يرضيك 

بدخل دروب الغزل و اكتب لك قصيده

تحكي عن قلب(ن) يحبِّك و يغليك

تسمِّيت له نبضه و تسمِّيت بوريده

لو تقطع و تجفى .. ما يقوى يجافيك

و ان وصلت .. يا فرحته بلحظه سعيده

علامك .. ما تدري هالقلب هاويك

ولَّا على بالك بالتِّغلي حبِّي تبيده

انت تتغلَّى و تخطي و أبقى ابيك

و انت الوحيد اللِّي جفاه يزيد برصيده

تغلط و اعتذر .. و ليت اقوى اخلِّيك

أو أخفف النَّار اللِّي بقلبي وقيده

أحبك و أعشقك .. و كلٍّي يفديك

يا زين من مثلي و وش اللِّي بإيده

وان كان الوصال مقطوع .. ببقى أغلِّيك

و اخط لك قصايد ما بها من نقيده

ليتهاو اللِّي تشيل من خاطري فيك

و ليتني اللِّي ما بقلبه حب(ن) يقيده

يا دروب الغزل لو ما شكيتيني أشكيك

حب(ن) جرِّني لمواطي بعيده

لا قيس(ن) وطاها و لا عنتر مواطيك

بالغلط دسته و ما قصدي أريده

دام الحكي ما ينفعك و ما عاد يرضيك

على دروب الغزل انسج لك احلا قصيده

قلم : سحر صوان

قصيده : عيد ميلاده

القصيدة انكتبت تلبية لطب وحدة في عيد ميلاد زوجها.

الـيُــوم عـيـدك واحـتـرت وش اهـديـك

رخَـصَــت بعـيـنـي لك كِــل الـهــدايـــا

عـسـى الفـرحـه تــلازِمــك و تـجــيـك

و انــا فـرحـتـي مـضـمُونه دامك معايا

عـســانـا ســوا و كــل عـــام أهـنِّــيــك

جـهــر و ســر و باحـســاس الـنــوايــا

مــا تـهُــون يـا عـمـري بيـومك أخلـيك

و انــا حـيــاتـي مـعــك أحـلا الـحـكـايـا

يــا احـمـد لــو تـدري وش كـثر أغـليك

و حــبـك مـتـربـع(ن) بـيـــن الـحـنـايــا

كـــان تــدعـــي ربـــك لــي يـخــلــيــك

و يـطــوِّل عــمـــرك بـلـيَّـــا خــطــايــا

لاجـــل تـرضــي قـلــبـي اللِّــي يـبـيــك

قـلــب (ن) بــدُونـــــك مـجــرَّد بـقـــايـا

يــا أعــــــز النــــاس ودي أوصــيــــك

عـلـــى قـلـبـي تــكــفــى حـقــق مـنـايــا

لا قـلـت تـكــفـى و سـمـعــتـني انـاديـك 

بـيــــع خـــلــق الله كــلــهــــم فـــــدايـــا

و بالـمـقـابـل عـمــري كــلـه اعــطـيـك

تـصـيـر 28 .. و لك عـمــري هــدايــا

تـسـتــاهــل و انـــا اللِّـي امـــوت فـيـك

لو اني بحبك سكرت كان للخمره نهايه

يحـق لي احـبك وانت المرجـله تغزيـك

عــز و شـهــامــه و خــيــر الـعـطــايـا

شريـف بحاضـرك و شريـف بماضـيـك 

و ان مــا مـدحــت الله يعـرف الخـفـايـا

من جيــتـك بالسـعـاده ترويني و ارويك

كـــانــي هـــوا لك و كـانـــك هــوايـــا

يــــا أحــــمــد بعــيــدك ودي اهــنِّـيـك

و أقـولك ســاكــن قـلـبـي بكل الزوايـا

قلمي : سحر صوان

قصيدة : يا سارق الشعر

بصصراحه هذه القصيده كتبتها في سآعة قهر بعد ما تعرضت احدى قصائدي للسرقه !

و يمكن فيها كثير من الاخطاء ..

الا يا سارق الشعر ببرودة الدم

لا تحسب بسرقتك صرت شاعر

تراك ما غير تحط لك سم

تتجرعه و يذبحك بيومنا الآخر

السرقه حرام ولا انصمخت و أصم

تحلل و تحرِّم على كيفك الظَّاهر

الشعر ماهو بالغصب يا عم !

ولا حلالك تعب غيرك السَّاهر

هــذا الشعر مو كلام ملتم 

هذه احاسيس و بوح من خاطر

ولَّا تبي تصير باب مفتوح للذَّم

ذام(ن) فيك كل من حاضر

ياخي خاف ربك و بالآخره اهتم

ما ظنتي سرقه تنوِّر ظلمة مقابر

قلمي : سحر صوان

قصيده : مالي على الفراق طاقه

بلـيـــلـة(ن) الـقـمـــر فـيـهـا مـا بـان

جــا بـعـد عــمـري يـعــلـن فــراقـه !

جـا و انــا اللِّــي كـنـت لــه ولـهـــان

مـاسـك(ن) قـلـبـي لا يـنـثر اشواقـه

قـال فــراق بـلا مـقـدمــه و عــنـوان

و انــا مـالــي عـلـى الـفــراق طــاقه

بـعـدهــا راح بـلـمـحـة عـيــن بـثوان

و قـلــبـــي بــعـــده كــانه بـاعــاقـه !

لا يـحـب ولا يـعـشـق و فـاقـد حـنان

و الــرُّوح مـشـتــاقــة لــه و تـــوَّاقـه

سـقــانــي فـنجـال سـمُّـــوه حــرمـان

و انا سقـيـته حب من القلب و اعماقه

اجل كذا يا صاحبي تجازي الاحسان 

لا كـنـت تـبـي بُـعـدي خبـرني برفاقه

انـا اللِّـي سـوِّيت لك من الحـب بستان

و رسـمـتـك شمـس(ن) تـعلن اشراقه

و رفـعـت قـدرك و سـوِّيـتـك سلطـان

تـأســر قـلـبـي و بـعـد تـأمـر بإعتـاقه

قـلِّـي ليـه تـفـارق و مـا هـو بنـسـيــان 

و حنَّا مجربين و قلوبنا بالعشق ذوَّاقه

يعنـي ترضيـك حـالتي باللِّيـل سهران

و خــفُــوقـي تـحــــن لك و مـشـتــاقـه

ويـــن اهــتــمــام اول و الــحــنـــان ؟

يا زيـن زمـان اوَّل و يا زين اخـلاقه

قلمي : سحر صوان

قصيدة : رمضان

قصيده : ساكن(ن) فيني

كيف تطلب أنساك و انت ساكن(ن) فيني

انا ماني قليل أصل و أنسى خل(ن) هويته

ولو ما هويتني و ما كان يهمك حزني و انيني

انا قلبي هاويك و هذا قلبي بيتك اذا جيته

ياللِّي فرشت لك رمشي و سميتك نظر عيني

محد (ن) له بقلبي غلا .. لغيرك والله لفيته

كلمه من شفاتك تكفيني و زياده ترويني

ياللِّي عطيتك حب محد(ن) سبق و عطيته

قبل لقياك كنت الفرحه الناقصة بسنيني

كأنك فرح(ن) و بأحلا صدفه لقيته

ياللِّي سامح(ن) لك تجرح بليَّا طعون سكيني

من بد البشر و الخلق الوحيد اللِّي تمنِّيته

لا أقبلت صوبي يفزِّ لك قلبي مقطِّع شراييني

ما عمر قلبي عصاني و هالمره انا ما عصيته

ياللِّي من كاس السعاده مرَّات تسقيني

و من كاس الوجع ارتوى قلبي كثر ما سقيته

يا كثر ما استحملك..و يا كثر ما تخطِّيني

لو الشَّغله بيدِّي صدِّقني هالوضع ما رضيته

لكن لي قلب(ن) بالهوى يحب يعنِّيني

كل ما أبي أخفف غلاه ألاقيني عزِّيته

و اذا سرحت و أحد(ن) يناديني انا ويني

ألقى نفسي أتوه بسراب اللِّي حبِّيته

حشى هذا حب ! ولَّا عذاب(ن) يجازيني

بفعل(ن) فعلته أو بالماضي سوِّيته

انا اللِّي عزِّيت قدرك و بغيتك توافيني

هذا انا اوفي نفسي على اللِّي جنيته

صرت عذابي و فرحتي و الحلم اللِّي يحيني

و صرت قهري و بسمتي و اللِّي بقصيدي سمِّيته

لو أدري قصيدي بعشقي يواسيني

لاصبح لك شاعر(ن) و اصبح اللِّي بغيته

قلم : سحر صوان